بیر مکتوب یازاجاغام سنه ،
سئوگیدن باشقا هر شئی دن ؛
یئردن ، گؤیدن ،
گولدن ، چیچک دن
بیرده سینه مین آلتیندا
یارآلی قوش کیمی چیرپینان
سیندیقجا سینان ،
آرزولارینا قیسیلان
یئتیم بیر اوره ک دن
بیر مکتوب یازاجاغام سنه ،
سئوگیدن باشقا هر شئیدن ؛
یاشاجاغام قارا نقوش لارین
یووا تیکمه ییندن
یئتیم بیر اوشاغین
بیرپارچا چؤرک اوچون
گلیب - گئده نه بویون بوکمه ییندن
هیند فیلمینه باخیب
آغلایان جاوانلاردان ،
سویوق قیش گئجه سینده تنهالیقدان ،
آیا اوز توتوب
اولایان یالقوزاقدان
آناسینی آختاران
قوزونون مه لرتیسیندن
اوفاجیق بیر چیراغین
بیر اوتاغی قیزدیران
آلوو لچک لی هنیرتیسیندن
بیرمکتوب یازاجاغام سنه ،
سئوگیدن باشقا هر شئی دن ،
بیر خسته نین حکیمه
اومیدله باخان
گؤزلریندن یازاجاغام
گلینجیکله بزنمیش
ماشینلارین سیراسیندان
یووالاریندان یئم گؤزله ین بالالارین
دیمدییی نین ساریسیندان
گئتدیک جه سویویان هاوادان ،
آدمدن ، هوّادان ،
نئجه اولور تنها آدام .
باخ ، بونلاردان یازاجاغام .
بیرده
یئردن ، گؤیدن.
چوبان دوداغلارینی
یاندیران نئی دن ،
بیر مکتوب یازاجاغام سنه .
سئوگیدن باشقا هر شئی دن ،
بلکه ده بونو وصیّتیم ،
سون سؤزوم بیله جک سن .
بیرمکتوب یازاجاغام
هر شئی یی اؤزون بیله جکسن .
نصرت کسمنلی
درباره این سایت